ब्रेकिंग

विदेश

चीनच्या रसायन कंपनीतील बळींची संख्या पाचवर

Samruddhi Dhayagude
28 May 2025

एकोणीस जखमी; सहा बेपत्ता

बीजिंग : चीनमधील रासायनिक संयंत्रातील भीषण स्फोटातील मृतांची संख्या पाच झाली असून १९ जखमी आहेत. बुधवारी मदतकार्य सुरू होते. सहाजण बेपत्ता असून त्यांचा शोध घेतला जात आहे.

शांगडोंग प्रांतातील वेईफंग शहरातील औद्योगिक भागात मंगळवारी प्रकल्पातील एका संयंत्रात भीषण स्फोट झाला होता. सफोटामुळे परिसरातील इमारतींच्या खिडक्यांच्या काचा फुटल्या, दाट पांढर्‍या धुराचे लोट आकाशात उसळले होते. या संदर्भातील चित्रफिती समाज माध्यमांवर फिरल्या होत्या. मात्र, स्फोटाचे कारण उघड झालेले नाही.

हॉटेलच्या काचा फुटल्या

घटनास्थळापासून सुमारे एक किलोमीटरवरील हॉटेलमध्ये स्फोटाचे हादरे जाणवले होते. झांग लियू हा कर्मचारी भोजन ग्राहकांना देत असताना स्फोटामुळे हॉटेलच्या खिडक्याच्या फुटल्या. छताचा भागही कोसळला होता. दुर्घटनेत कोणीही जखमी झाले नव्हते, असे त्याने सांगितले. घटनास्थळावरुन तीन किलोमीटवरील एका हॉटेलमध्ये अशाच प्रकारचा हादरा बसला होता. एका महिलेने सांगितले की, एखादा भूकंप झाल्याप्रमाणे जमीन हादरली होती. खिडक्यांच्या काचा फुटल्या होत्या. त्या शिवाय अन्य नुकसान झाले नसल्याचे झांग यांनी सांगितले.

लाल, पिवळा धूर बाहेर पडला

एका शालेय विद्यार्थ्याने स्फोटाची माहिती देताना सांगितले की, स्फोटानंतर संयत्रातून पिवळा आणि लाल धूर बाहेर पडला. त्याचा वासही विचित्र होता. यानंतर मुलांना मास्कचे वाटप करण्यात आले आणि तो काढू नका, असे बजावले होते.

प्रदूषणाची मात्रा किती ?

एका पर्यावरणवाद्याने सांगितले की, तज्ज्ञांचे पथक घटनास्थळी रवाना केले आहे. प्रदूषणाबाबत पाहणी आाणि अहवालानंतर प्रदूषण किती झाले ? याचा मागोवा घेता येणे शक्य आहे.

खते आणि औषधांसाठी रसायन निर्मिती

गोओमी युडाओ रसायन कंपनीकडून रसायनिक प्रकल्प चालविला जात होता.खते आणि औषधांसाठी रसायनांची निर्मिती केली जात होेती. तेथे पाचशेहून अधिक कर्मचारी काम करत होते. स्फोटानंतर मदतकार्यासाठी अग्निशमन दलाचे सुमारे २३० कर्मचारी धावले. आता सीसीटीव्हीतून स्फोटाचे कारण शोधले जात आहे